Në prag të 8 marsit, Ditës Ndërkombëtare të Gruas, Durrësi vlerësoi dhjetë gra të shquara për arritjet e tyre. Për të 27-in vit radhazi, aktivistja dhe poetja Myzejen Konduri dhe shoqata e saj nderuan jo vetëm suksesin profesional të grave, por edhe kontributin e tyre të pazëvendësueshëm në shoqëri, duke e kthyer këtë traditë në një simbol të vlerësimit dhe respektit për punën dhe përkushtimin e tyre.
Këtë vit u nderuan:
1. Denisa Luarasi – Menaxhere e “Agjencisë së Sigurimeve” dhe anëtare e Këshillit Bashkiak
2. Dr. Ajtanka Bardhi – Drejtoreshë e Qendrës Shëndetësore Nr. 5 në lagjen 16, Durrës
3. Dr. Valbona Sakollari–Administratore biznesi
4. Katerina Kordha– Administratore e një rrobaqepësie
5. Feruze Karamani – Administratore hoteli
6. Rrezarta Gjergji – Nën/Drejtoreshë e shkollës “Kushtrimi i Lirisë”
7. Doriana Nikolla – Ekonomiste
8. Shqiponja Meta – Avokate
9. Xhelina Hoxha– Farmaciste
10. Jonida Spaho – Stomatologe
Në këtë event u vlerësua gjithashtu edhe gazetarja Anila Basha, për mbështetjen e saj ndaj kauzës së vajzave dhe grave.
Në fjalën e saj, organizatorja Myzejen Konduri theksoi se ky vit, si një vit zgjedhjesh, duhet të shënojë një angazhim më të madh për të dëgjuar dhe adresuar shqetësimet e grave.
“Nuk do të jemi të shpërfillshme ndaj britmave të dëshpëruara të grave të dhunuara, ndaj burrave vrasës që masakrojnë gratë me egërsi dhe ndaj ulërimave të fëmijëve të bullizuar”, u shpreh Konduri me tone të forta. Ajo theksoi rëndësinë e respektit, vlerësimit dhe mirëkuptimit për mirëqenien e familjes dhe të shoqërisë.
Ajo gjithashtu ndau katër ëndrrat kryesore të grave për të ardhmen:
1. Një familje të lumtur
2. Një atdhe të bekuar dhe të paqtë
3. Një jetë me sa më shumë dashuri dhe mirësi
4. Një politikë më të vëmendshme ndaj grave dhe të rinjve
“Gruaja i përket përjetësisë sepse ajo siguron vazhdimësinë e së ardhmes”, tha Konduri, duke theksuar rolin e pandalshëm të grave në ndërtimin e një shoqërie më të mirë.
Një dorë e zgjatur për fëmijët në nevojë
Pjesë e këtij eventi ishin edhe 20 nxënës të shkollës “Kushtrimi i Lirisë”, familjet e të cilëve janë prekur nga tërmeti apo kanë vështirësi ekonomike. Ata morën dhurata simbolike, një gjest që synon të sjellë shpresë dhe gëzim në jetët e tyre.
Në fund të fjalës së saj, Konduri dha një mesazh frymëzues për vitin e ardhshëm:
“Së bashku, me më shumë dashuri, mirëkuptim dhe suksese që të ndriçojnë jetët tona! Uroj të lindë vetëm dielli në sytë e fëmijëve tanë!”
Ky event i kthyer në traditë me këmbënguljen e organizatores Konduri është një dëshmi e rëndësisë që ka vlerësimi i grave në çdo fushë të jetës dhe një thirrje për më shumë mbështetje ndaj tyre në një shoqëri që ende përballet me sfida të mëdha.
V.Q.
©️zërionline
