Kreu i Koalicionit Euroatlantik për zgjedhjet e 11 majit, Lulzim Basha, vijon të përdorë ironinë dhe autoironinë për të thumbuar rivalin e tij politik, kryeministrin Edi Rama, ndërsa vazhdon të prezantojë kandidatët e koalicionit euroatlantik në rrethe. Në një postim të fundit në rrjetet sociale, Basha nuk ka kursyer një shigjetim të drejtpërdrejtë për Ramën, duke e drejtuar atë në mënyrë ironike te besnikët e kryeministrit Rama në parti.
Duke shfaqur një ton humori, Basha i drejtohet Ramës me pyetjen që nënkupton një kritikë të hidhur: “Me kmish nate apo kmish burgu? Me çar i ke vesh shokët Rame”. Kjo shprehje, e mbushur me nënkuptime, e që përmes “parodisë” bashiane ka për qëllim të tërheqë vëmendjen tek koalicioni dhe vetja, ndërsa parodizon situatën e liderit të qeverisë dhe imazhin e mjaft elementeve të partisë të goditur muajt e fundit nga SPAK.
Në postim, Basha përdor edhe një veprim matematikor, vetëm në dukje të çuditshëm, “7×7=313”. Një shumëzim i gabuar, autoironik por që i kujton kundërshtarit politik fundin e shumë prej figurave të partisë të promovuar prej tij në poste kyçe të qeverisë e pushtetit vendor. Një mënyrë kjo për të ironizuar dhe për t’i kujtuar se logjika e qeverisë është “e gabuar” dhe jo matematika e tij.
Ky postim e të tjerë para tij janë pjesë e një fushate më të gjerë të Bashës për zgjedhjet e 11 majit. Përmes saj ai po kthen vêmendjen e harruar tek vetja dhe kandidatët e koalicionit euroatlantik.
©️zërionline
