Ambientet e Universitetit “Aleksandër Moisiu” në Durrës u kthyen sot në një qendër solidariteti, ku studentët dhuruan gjak në kuadër të një fushate të organizuar nga Qendra Kombëtare e Transfuzionit të Gjakut. Njësia e tyre lëvizëse u vendos pranë kampusit për të lehtësuar pjesëmarrjen e të rinjve.
Në bashkëpunim me drejtuesit e universitetit, u organizuan sesione informimi mbi rëndësinë e dhurimit, përfitimet për shëndetin personal dhe ndikimin që ky gjest ka për komunitetin.
“Synimi ynë është të rrisim ndërgjegjësimin për dhurimin vullnetar të gjakut dhe të forcojmë rezervat kombëtare, që janë jetike për pacientët në nevojë”, – deklaroi mjeku transfuzolog Kristo Raca, pjesë e stafit të Qendrës Kombëtare të Transfuzionit të Gjakut.
Përjetimi i studentëve
Studentët e pranishëm treguan se ky është një akt i thjeshtë, por me vlerë të jashtëzakonshme.
“Vendosa të dhuroj gjak, sepse e konsideroj një akt solidariteti që mund t’i shpëtojë jetën dikujt”, u shpreh një prej tyre.
Një mision që vazhdon
Qendra Kombëtare e Transfuzionit të Gjakut zhvillon rregullisht fushata të tilla në universitete, shkolla dhe institucione të tjera në të gjithë vendin, duke kontribuar në krijimin e një kulture të dhurimit dhe për një sistem sa më të sigurt të transfuzionit të gjakut.
©️zërionline
