Një tjetër ngjarje tragjike u shkrua në sagën e një konflikti të përgjakshëm që vijon prej më shumë se tri dekadash. Pjetër Kaza, 57 vjeç, u gjet i vrarë në orët e para të mëngjesit në oborrin e banesës së tij në fshatin Tale të Lezhës. Trupi i pajetë i tij u zbulua rreth orës 05:00 nga bashkëshortja, i qëlluar me armë zjarri.
Sipas burimeve nga policia, Kaza kishte përfunduar turnin e natës në minierën e Spaçit dhe ishte kthyer në banesë rreth orës 01:00 pas mesnate. Jo shumë orë më vonë, ai do të gjendej i pajetë, në një akt që hetuesit e konsiderojnë si pjesë të një zinxhiri hakmarrjeje të pandërprerë.
Rrënjët e tragjedisë së Kazajve shtrihen në vitin 1994, kur në mes të qytetit të Rrëshenit u vra Ndue Kaza, ish-shef i krimeve. Autorët e dyshuar të vrasjes së tij, vëllezërit Dod dhe Augustin Gjini, u arratisën menjëherë pas ngjarjes. Por konfliktit nuk iu vu kapak. Tre vite më pas, në vitin 1997, Martin Kaza, vëllai i Ndue Kazës, vrau për hakmarrje dy vëllezërit Gjini në qytetin e Laçit, për këtë u dënua me 22 vite burgim.
Ndërsa duket se plagët e vjetra nuk janë shëruar kurrë, zinxhiri i dhunës vijoi edhe në dekadën e tretë të tij. Më 28 prill 2024, në një lokal shqiptarësh në Bruksel të Belgjikës, u ekzekutua Agustin Kaza, vëllai i Pjetrit. Ai u qëllua për vdekje me goditje të shumta në kokë dhe kraharor, duke i rikthyer edhe një herë institucionet në gjurmët e gjakmarrjes që nuk mbaron.
Pjetër Kaza, viktima e radhës e një gjakmarrjeje të gjatë
Vrasja e Pjetër Kazës ngjall frikën se cikli i gjakut mund të mos ketë ende përfunduar. Ai është viktima e tretë në familjen Kaza, e cila duket se nuk ka mundur të dalë nga errësira e një konflikti të nisur mbi 30 vite më parë.
Policia dhe prokuroria kanë përqendruar hetimet në pistën e hakmarrjes. Aktualisht, po punohet për identifikimin e autorëve të krimit dhe zbardhjen e plotë të rrethanave që çuan në ekzekutimin e 57-vjeçarit.
Ngjarja tronditëse e Tale-s është një tjetër dëshmi se plagët e së shkuarës së dhunshme në disa zona të vendit që mbajnë gjallë gjakmarrjen vijojnë të prodhojnë viktima dhe të mbajnë gjallë një mentalitet të rrezikshëm gjakmarrjeje, që vret pa dallim kohën apo vendin. Kur do të ndalet kjo histori e gjatë gjaku dhe dhimbjeje?
©️zërionline
