Pranga për pronarin e jet skisë që u përdor në incidentin që mori jetën e një turisti në Durrës.
Policia e Durrësit ka arrestuar Luis Xhumarin, operator turistik, për akuzën “Shkelje e rregullave të mbrojtjes në punë”, pas incidentit tragjik që ndodhi në det me dy pushues anglezë, ku humbi jetën drejtuesi 34-vjeçar i një Jet Ski.
Ngjarja ndodhi në thellësi të detit, ndërsa ende nuk është përcaktuar shkaku i saktë i vdekjes së viktimës. Ekspertiza mjeko-ligjore pritet të përcaktojë nëse vdekja ka ardhur si pasojë e mbytjes apo e ndonjë problemi shëndetësor, si p.sh. atak kardiak.
Nga verifikimet e policisë rezulton se viktima nuk posedonte lejen për drejtimin e mjetit lundrues, ndërkohë që operatori turistik që ia kishte dhënë me qira mjetin është konstatuar në shkelje të rregullores. Sipas ligjit, motorët e ujit mund të jepen me qira vetëm për persona mbi 18 vjeç dhe drejtuesi duhet të jetë i pajisur me leje përkatëse të lëshuar nga Drejtoria e Përgjithshme Detare. Në rast se pushuesi nuk e zotëron këtë leje, drejtimi i mjetit duhet të bëhet nga një punonjës i operatorit.
Ngjarja ka ngritur pikëpyetje për sigurinë në plazhet turistike dhe zbatimin e rregullave ligjore nga operatorët turistikë në sezonin veror.
©️zërionline
