Përgjaket Kurban Bajrami në Kavajë. Një ngjarje e rëndë është shënuar në fshatin Gosë të Rrogozhinës, ku dy persona kanë mbetur të plagosur pas një konflikti me armë zjarri. Të plagosurit janë bashkëshortët Sami dhe Nadire Disha, të cilët, sipas deklarimeve paraprake, janë qëlluar nga fqinji i tyre pas një debati për motive të dobëta.
Ngjarja ka ndodhur pas një përplasjeje verbale që, sipas familjarëve të çiftit, ka nisur për shkak të bagëtive që kishin hyrë në tokën e autorit të dyshuar, Shpëtim Osma. Konflikti ka degjeneruar në përdorimin e armës së zjarrit, duke lënë të plagosur çiftin Disha. Gruaja është qëlluar në bark, ndërsa burri në këmbë.
Të dy të plagosurit janë transportuar menjëherë në spitalin e Durrësit, ku ndodhen jashtë rrezikut për jetën. Ata janë marrë në pyetje nga policia, ku kanë dhënë dëshminë e tyre mbi rrethanat e konfliktit, të cilin e kanë cilësuar si banal.
Ndërkohë, policia po vijon punën për kapjen e autorit të dyshuar, i cili është larguar nga vendngjarja pas sulmit. Hetimet janë në vijim për zbardhjen e plotë të rrethanave të kësaj ngjarjeje.
©️zërionline
