Deçani, këtë të enjte, u përball me pasojën e një ngjarjeje të rëndë që ndodhi në Kanada dhe ka tronditur komunitetin atje, por edhe në Kosovë nga ishin dy viktimat. Një nënë e re dhe djali i saj i mitur dyshohet se janë mbytur në një pishinë, në rrethana që ende nuk janë sqaruar plotësisht.
Lajmi është konfirmuar nga kryetari i komunës së Deçanit, Bashkim Ramosaj, i cili përmes një postimi emocional në rrjetet sociale ka shprehur dhimbjen për humbjen e Elzina Halit Ramosajt dhe djalit të saj, Elonit.
“Na e keni vrarë zemrën sot”, shkruan Ramosaj. I kontaktuar nga mediat, Ramosaj ka treguar shkurtimisht një version të mundshëm, po bindës të ngjarjes: “Dyshohet që djali ka rënë në pishinë dhe nëna ka hyrë për ta shpëtuar, po nuk ka mundur”.
Megjithatë nuk ka ende një deklaratë zyrtare mbi rrethanat e vdekjes së dyfishtë. Policia është vënë në lëvizje për të mbledhur informacion dhe për të hetuar më tej këtë rast tragjik që ka prekur opininionin publik dhe zemrat e shumë qytetarëve.
Fjalët e fundit të kryetarit Ramosaj tingëllojnë si një homazh i thjeshtë dhe i thellë:
“Elzina dhe Elon, u prehshi në paqe!”
©️zërionline
