Me rërën që ngrohet nga dielli dhe horizontin që shtrihet i pafund në Adriatik, Durrësi nuk është vetëm një destinacion për plazhistët, por një parajsë e vërtetë për ata që ndjekin erën, të apasionuarit e windsurf-it.
Në gjirin e Porto Romanos, nën tingujt e dallgëve dhe në pritje të brezave të erës, të apasionuarit e këtij sporti, amatorë a profesionistë qofshin, përgatiten me kujdes. Vela, dërrasa, erë e kripur plot jod dhe mushkëri të mbushura me adrenalinë. Është një rutinë që nuk lodh kurrë, përkundrazi, ushqen pasionin.
Porto Romano, edhe pse zonë industriale, po kthehet në një hapësirë alternative për sportet ujore. Erërat e qëndrueshme që fryjnë në mesditë e tutje dhe gjiri i gjerë e i mbrojtur e bëjnë atë ideal për ata që janë në fillimet e këtij sporti, por edhe për të avancuarit që kërkojnë manovra më të guximshme.
Rrugëtimi i uindsërfistëve nuk ndalet aty. Ata shpesh ndjekin linjën bregdetare në vazhdim, aty ku panorama është një përzierje e mrekullueshme midis qytetit dhe natyrës. Në ditët kur era fryn më fort, sfida e tyre bëhet më e ëmbël, me shpejtësi mbi valë dhe ndjesinë unike të të qenit njësh me detin.
Të apasionuarit nuk ndalen as kur plazhet boshatisen nga pushuesit e zakonshëm, por era vijon të fryjë me ritme të përsosura. Madje i gjurmojnë ato, plazhet e qeta.
Aty, pasioni merr një dimension më intim, mes njeriut dhe natyrës, pa spektatorë, pa zhurmë, vetëm për kënaqësinë e pastër.
Nga Porto Romano e deri tek Kepi i Rodonit, windsurfistët dinë ta ndjekin erën. Për ta, ajo nuk është vetëm një fenomen natyror, por një udhërrëfyes që i çon përtej limiteve fizike e mendore, drejt një lirie që vetëm deti mund ta ofrojë.
Nëse je aty, në breg, dhe sheh një siluetë që rrëshqet me shpejtësi mbi dallgë, dije se nuk po shikon thjesht një sportist apo të apasionuar, por një ëndërr që fryhet nga era.
V. Q.
©️zërionline
