Policia e Durrësit po vijon aksionin “Plazhi i Lirë”, që synon t’u rikthejë pushuesve hapësirat publike të zëna në mënyrë të paligjshme përgjatë vijës bregdetare.
Gjatë kontrolleve të fundit në lagjen nr. 15, shërbimet e Komisariatit të Policisë Durrës konstatuan tri parcela publike në plazhin e Kallmit të bllokuara me pajisje plazhi pa lejen përkatëse. Pasi u larguan strukturat provizore, u sekuestruan në cilësinë e provës materiale 70 komplete me çadra dhe shezlongë.
Për pasojë, ndaj shtetasve A. H., 61 vjeç; E. S., 36 vjeç; dhe F. H., 64 vjeçe, të tre banues në Durrës, është ngritur procedim penal në gjendje të lirë për “zaptim toke” dhe “ushtrim aktiviteti pa leje”. Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës.
Policia deklaron se kontrollet do të vazhdojnë gjatë gjithë sezonit veror në të gjitha plazhet e qarkut, për të garantuar shfrytëzimin e lirë dhe të ligjshëm të zonave publike dhe për të verifikuar subjektet që ofrojnë shërbime plazhi.
©️zërionline
