Fototeka kombëtare “Marubi” ka marrë një nga vlerësimet më të larta ndërkombëtare në fushën e trashëgimisë kulturore. Arkivi i negativëve, objekteve dhe dokumenteve të pionierëve të fotografisë shqiptare, Pietro dhe Kel Marubi, është përfshirë zyrtarisht në Regjistrin Ndërkombëtar të Kujtesës së Botës pranë UNESCO-s.
Çertifikimi është dhënë nga vetë drejtuesja e përgjithshme e UNESCO-s, Audrey Azoulay, duke e vendosur këtë koleksion unik mes pasurive më të çmuara të kujtesës vizuale globale.
Arkivi i përfshirë në këtë listë të nderuar ruhet në Muzeun Kombëtar të Fotografisë “Marubi” në Shkodër. Ai përmban një trashëgimi të jashtëzakonshme që dokumenton jetën, shoqërinë dhe transformimet e Shqipërisë nga fundi i shekullit XIX deri në mesin e shekullit XX.
“Jemi të lumtur të ndajmë me ju këtë njohje ndërkombëtare për trashëgiminë tonë kulturore, një pasuri që na përket të gjithëve”, thuhet në njoftimin zyrtar të institucionit, që shpreh krenarinë për këtë arritje.
Ky vlerësim historik është gjithashtu rezultat i përkushtimit dhe profesionalizmit të stafit të muzeut “Marubi”, të cilët ndër vite kanë punuar me përkushtim për ruajtjen, studimin dhe promovimin e kësaj trashëgimie të rrallë që tashmë i përket jo vetëm Shqipërisë, por edhe botës.
©️zërionline
