Prej dy ditësh, një zjarr i përmasave të mëdha vijon të djegë malin e fshatit Dukat në Vlorë, duke shkrumbuar një sipërfaqe të konsiderueshme pyjore. Flakët kanë përfshirë një zonë me pisha, bredha dhe bimësi të dendur, ndërsa ndërhyrja është jashtëzakonisht e vështirë për shkak të terrenit të thepisur dhe mungesës së rrugëve që të çojnë pranë vatrës së zjarrit.
Forcat zjarrfikëse po punojnë në kushte të vështira, duke përdorur mjete rrethanore për të ndaluar përhapjen e flakëve. Gjatë ditës së djeshme është ndërhyrë edhe nga ajri me helikopterë, ndërsa forcat në terren po luftojnë për të mbajtur situatën nën kontroll.
Për shkak të situatës së përkeqësuar në disa qarqe, Ministria e Mbrojtjes njoftoi se Shqipëria aktivizoi më 6 korrik Mekanizmin Evropian të Mbrojtjes Civile, nën koordinimin e Agjencisë Kombëtare të Mbrojtjes Civile.
Në kuadër të këtij mekanizmi, janë angazhuar dy avionë “Canadair” nga Greqia, pjesë e kapaciteteve rescEU, të cilët realizuan 10 hedhje uji në zonat e përfshira nga flakët dhe u rikthyen të njëjtën ditë.
Sipas të dhënave zyrtare, deri më 7 korrik janë djegur 1,162 hektarë në qarqet e Vlorës dhe Gjirokastrës, ndërsa rreziku për përhapje të zjarreve mbetet ende i lartë.
Ministria e Mbrojtjes i bën thirrje qytetarëve që të tregojnë kujdes të shtuar dhe të raportojnë menjëherë çdo vatër zjarri pranë strukturave të emergjencës.
©️zërionline
