Policia e Durrësit ka finalizuar me sukses operacionin e koduar “Wanted”, duke çuar në pranga një 17-vjeçar të shpallur në kërkim për një ngjarje të rëndë të ndodhur në muajin maj.
Në sajë të bashkëpunimit mes specialistëve të Krimeve të Rënda, shërbimeve operacionale të DVP Durrës dhe Komisariatit të Policisë së qytetit, u bë i mundur lokalizimi dhe arrestimi i të riut A. N., në lagjen nr. 8 të Durrësit.
Shtetasi në fjalë ishte në kërkim pas një vendimi të Gjykatës së Shkallës së Parë të Juridiksionit të Përgjithshëm Durrës, e cila kishte caktuar ndaj tij masën e sigurisë “Arrest me burg”, për veprën penale “Plagosje e rëndë me dashje”.
Ngjarja për të cilën akuzohet 17-vjeçari ka ndodhur më 14 maj, kur ai dyshohet se ka plagosur rëndë me mjet prerës (thikë) një tjetër shtetas, me iniciale F. R.
Materialet procedurale i janë referuar tashmë Prokurorisë për vijimin e veprimeve të mëtejshme ligjore.
©️zërionline
