Në një situatë të pazakontë për administratën vendore në vend, këtë korrik të nxehtë, Bashkia Librazhd është ndër të paktat që ka reaguar në mënyrë institucionale, pas valës së parë të dorëheqjeve në nivelet e larta drejtuese. Në një njoftim zyrtar, Bashkia bën me dije se të gjithë administratorët e njësive administrative, nënkryetarët dhe drejtuesit e drejtorive kanë dhënë dorëheqjen nga detyra.
Ky zhvillim shënon një boshllëk të konsiderueshëm në strukturën drejtuese të bashkisë, por në të njëjtën kohë, ofron mundësi për një riformatim të administratës vendore. Bashkia ka shpallur zyrtarisht të gjitha pozicionet si të hapura dhe fton profesionistë të përkushtuar që duan të japin kontributin e tyre në shërbim të qytetarëve dhe komunitetit lokal.
Të gjithë ata që ndihen të aftë dhe të motivuar për të marrë pjesë në drejtimin vendor mund të aplikojnë për pozicionet e hapura. “Aplikimet pranohen deri më 31 korrik 2025”, thuhet në njoftimin e publikuar nga Bashkia Librazhd.
Kjo transparencë dhe hapje ndaj publikut vlerësohet si një hap pozitiv në drejtim të rritjes së besueshmërisë dhe përfshirjes së qytetarëve në proceset vendimmarrëse. Në një kohë kur shumë bashki të tjera nuk kanë reaguar ende zyrtarisht për ndryshimet në administratë, qasja e Bashkisë Librazhd për të shpallur menjëherë vendet vakante dhe për të nisur procesin e aplikimeve mund të shërbejë si model edhe për bashkitë e tjera në vend, veçanërishtbashkitë e mëdha.
©️zërionline
