Një 34-vjeçar me shtetësi çeke është arrestuar nga policia, pasi dyshohet si autor i vjedhjes së një automjeti në Portin e Durrësit. Operacioni policor i koduar “Perimetri” u finalizua pas hetimeve të kryera nga specialistët për Hetimin e Krimeve në Komisariatin e Durrësit, në bashkëpunim me Komisariatin nr. 2 në Tiranë, nën drejtimin e Prokurorisë së Durrësit.
I arrestuari, me inicialet J. K., banues në Çeki, dyshohet se më datë 13 korrik ka vjedhur automjetin në pronësi të shtetasit A. Ç., 59 vjeç, banues në Durrës, brenda hapësirës së portit.
Pas hetimeve dhe koordinimit mes strukturave policore në Durrës dhe Tiranë, mjeti i vjedhur u gjurmua dhe u sekuestrua, ndërsa autori u lokalizua dhe u vu në pranga në kryeqytet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme, ndërsa ndaj 34-vjeçarit rëndon akuza për veprën penale “Vjedhja”.
©️zërionline
