Një magazinë ku falsifikohej data e skadencës së produkteve ushqimore është zbuluar ditën e sotme në Vorë.
Sipas policisë, në pranga ka rënë Florenc Domi administrator i subjektit tregtar dhe Agim Domi magazinier pranë subjektit. Ndërkohë, u proceduan penalisht shtetasit S. T., 56 vjeç, ortaku i subjektit dhe A. D., 36 vjeç, shofer i magazinës.
Nga hetimet ka rezultuar se subjekti me aktivitet import-eksport dhe tregtim të produkteve industriale dhe ushqimore, grumbullonte produkte të skaduara nga tregje të ndryshme në Tiranë, Durrës e Elbasan, u falsifikonte datat e skadencës dhe i hidhte sërish në treg, pa dokumentacion tatimor.
Bëhet fjalë për subjektin Master AL në Vorë, ku në pamjet e publikuara nga policia duken të gjitha produkte ushqimore që ishin të skaduara, por pasi u kanë zëvendësuar etiketat ato ishin bërë gati për tu hedhur në treg.
Gjatë operacionit u sekuestruan 716 koli dhe dhjetra kilogramë me mallra ushqimorë të përpunuara që kishin afatin e skadencës në janar dhe shkurt 2025 dhe afati i skadencës ishte falsifikuar me qëllim rihedhjen në treg për shitje.
