Një ngjarje e rëndë ka ndodhur në parkun e mbrojtur të Drilonit, në Pogradec, ku kryetari i fshatit Tushemisht është dhunuar fizikisht nga Jetmir Muçllari, pronar i “Hotel Driloni”, pas një konflikti të tensionuar për zaptimin e hapësirave publike. Ngjarja ka ndodhur në sy të qytetarëve dhe zyrtarëve të bashkisë, ndër ta edhe shefi i urbanistikës, P. Ziko, i cili ka qenë prezent, por nuk ka mundur të ndalojë përshkallëzimin e dhunës.
Ndërkohë policia ka deklaruar se ka nisur procedimin penal për katër personat e përfshirë në konflikt pa përcaktuar kush goditi kë.
Për vite me radhë, banorët dhe pronarë të tokave pranë parkut kanë denoncuar zgjerimin e paligjshëm të aktivitetit të biznesit të Jetmir Muçllarit, i cili akuzohet se ka zaptuar zona publike, ka rrethuar urat dhe rrugët, duke pamundësuar aksesin e qytetarëve në pronat e tyre.
Përkundër fushatës së qeverisë për lirimin e hapësirave publike në zonat turistike, situata në parkun e Drilonit vazhdon të përkeqësohet. Zaptimet jo vetëm nuk janë ndaluar, por janë shoqëruar me prishje strukturash dhe konfrontime të dhunshme. Ngjarja e fundit e dhunës ndaj një përfaqësuesi vendor tregon thellimin e krizës dhe mungesën e ndërhyrjes efektive të institucioneve përgjegjëse.
Reagimi i policisë
Pas incidentit, Policia e Pogradecit ka reaguar duke nisur procedim penal ndaj katër shtetasve të përfshirë në konflikt. Specialistët për Hetimin e Krimeve në Komisariatin e Policisë Pogradec kanë referuar materialet në Prokurori, ku ka nisur procedimi penal ndaj shtetasve:
- I. T., 53 vjeç
- P. P., 35 vjeç
- J. M., 26 vjeç
- J. M., 52 vjeç
Të katër banues në Pogradec, këta shtetas dyshohet se kanë goditur njëri-tjetrin me sende të forta pas një konflikti për motive pronësie.
Ndërkohë, banorët e zonës kërkojnë hetim të thelluar dhe masa të qarta ligjore ndaj atyre që po shkelin haptazi të drejtat e komunitetit dhe po përvetësojnë hapësirat publike, duke e kthyer parkun e Drilonit në një zonë të konfliktit të hapur dhe të rrezikshëm.
©️zërionline
