Bota do të përjetojë një nga ngjarjet më spektakolare astronomike të kohëve të fundit: një eklips total diellor që do të zgjasë për një kohë të pabesueshme prej 6 minutash.
Fenomeni përshkruhet si “Eklipsi i Madh i Afrikës së Veriut” dhe po cilësohet si eklipsi i shekullit. Kjo do të ndodhë më 2 gusht 2027, ndërsa miliona njerëz në Evropën Jugore, Afrikën e Veriut dhe pjesë të Lindjes së Mesme, mund të përjetojnë momentet spektakolare.
Një eklips total diellor ndodh kur Hëna kalon direkt midis Tokës dhe Diellit, duke e mbuluar plotësisht Diellin për Tokësorët në shtegun e ngushtë të totalitetit. Për eklipsin e ardhshëm më 2 gusht 2027, shtegu do të shtrihet nëpër shumë zona, nga Oqeani Atlantik në pjesë të Evropës, Afrikës dhe Lindjes së Mesme.
Shtegu fillon në Oqeanin Atlantik të Veriut dhe së pari do të prekë tokën në Spanjën Jugore, konkretisht në Costa de la Luz (Bregu i Dritës) në rajonin e Andaluzisë. Nga atje, eklipsi do të vazhdojë drejt Gjibraltarit, territorit britanik përtej detit, përpara se të vazhdojë në jug drejt Afrikës së Veriut.
Ndërsa rruga lëviz në jug nga Spanja, ajo do të kalojë nëpër vende të tilla si Maroku, Algjeria, Tunizia, Libia dhe Egjipti. Egjipti do të përjetojë kohëzgjatjen më të gjatë, prej 6 minutash dhe 22 sekondash të errësirës totale në disa zona. Kjo do të ndodhë në qytete të tilla si Luxor dhe Berenice, të cilat janë vende ideale për gjuetarët e eklipsit.
Eklipsi do të vazhdojë në të gjithë Lindjen e Mesme, duke kaluar nëpër Arabinë Saudite, Jemenin dhe pjesë të Afrikës Lindore, përpara se të përfundojë udhëtimin e tij mbi Arkipelagun Chagos në Oqeanin Indian. Eklipsi do të prekë rreth 89 milionë njerëz, duke u ofruar atyre mundësinë e rrallë për të përjetuar një eklips total diellor.
Një nga aspektet më interesante të eklipsit total diellor të vitit 2027 është kohëzgjatja e tij e jashtëzakonshme. Eklipsi total do të zgjasë deri në 6 minuta e 22 sekonda, duke e bërë atë eklipsin total diellor më të gjatë që ka ndodhur në tokë.
Kohëzgjatja e një eklipsi total diellor varet nga orbita eliptike e Hënës dhe afërsia e saj me Tokën. Kur Hëna është më afër Tokës, hija e saj udhëton në një distancë më të madhe, duke bërë që eklipsi total të zgjasë më shumë.
Eklipsi i vitit 2027 do të ndodhë gjithashtu pranë ekuatorit, ku hija e Hënës mbulon një sipërfaqe më të madhe. Kombinimi i këtyre faktorëve e bën këtë eklips një nga më të mëdhenjtë dhe më spektakolarët për t’u parë.
