Një zjarr i përmasave të mëdha përfshiu mbrëmjen e sotme një apartament në katin e pestë të një pallati në lagjen nr. 1 të Durrësit, pranë shëtitores bregdetare.
Fatmirësisht, në momentin e rënies së flakëve në banesë nuk ndodhej askush, duke shmangur kështu pasoja në njerëz. Menjëherë pas njoftimit, shërbimet zjarrfikëse mbërritën në vendngjarje dhe ndërhynë për neutralizimin e flakëve. Falë ndërhyrjes së tyre të shpejtë, zjarri u izolua brenda apartamentit dhe nuk u përhap në katet e tjera të pallatit 12-katësh.
Megjithatë, gjithçka që ndodhej brenda apartamentit është shkrumbuar plotësisht, duke shkaktuar dëme të konsiderueshme materiale. Për shuarjen e zjarrit u angazhuan forca të shumta zjarrfikëse të qytetit.
Ndërkohë, është ngritur grupi hetimor që do të hetojë mbi shkaqet e rënies së zjarrit, të cilat deri më tani mbeten të paqarta.
©️zërionline
