Detaje të reja janë zbardhur në lidhje me Imer Krashin, i kapur sot nga policia, pasi fillimisht tentoi t’i ikte forcave të rendit me automjetin, duke bërë dhe një aksident. Zbulohet se është pjesë e grupit kriminal të Marklen Hakës.
Burime policore bëjnë me dije se Imer Krashi, 31 vjeç, është identifikuar si pjesë e strukturës së organizuar që drejtohet nga Haka.
Sipas burimeve, Imer Krashi, i cili aktualisht figuron me këtë emër, më herët ka qenë i njohur si Imer Masha apo Imer Uka, nga Kruja.
Krashi rezulton, sipas policisë, një person me rrezikshmëri të lartë shoqërore dhe precedent penal. Sipas mediave italiane ai, me emrin Imer Masha, raportohet më parë i ndaluar dhe në Itali.
Ndryshimi i identitetit konsiderohet nga blutë si përpjekje për të shmangur vëmendjen e autoriteteve dhe për të vepruar në prapaskenë.
31-vjeçari u ndalua sot nga policia në zonën e Liqenit të Thatë, pas informacionit se një person qarkullon me armë në automjet. Krashi sapo iu kërkua t’i bëhet kontroll automjetit, shkeli gazin duke u larguar nga zona.
Rrugës përplasi nëntë makina duke ikur me shpejtësi dhe një motor në të cilën ishte një polic me bashkëshorten e tij, të cilët u dërguan në spital me plagë të lehta, jashtë rrezikut për jetën. Më pas Krashi u vu në prangat e policisë dhe në automjet iu gjet dhe arma e zjarrit.
©️zërionline
