Policia e Durrësit ka konstatuar një tjetër rast të shfrytëzimit të hapësirave publike në mënyrë të paligjshme. Gjatë kontrolleve të zhvilluara në lagjen nr. 13, shërbimet e Komisariatit të Policisë Durrës zbuluan se pranë një lokali ishte ngritur një vendparkim për automjete, i cili përdorej pa asnjë autorizim.
Sipas hetimeve paraprake, hapësira publike ishte shndërruar në parkim në funksion të lokalit, ndërsa qytetarëve u merreshin para për vendosjen e makinave. Për këtë rast, është proceduar penalisht administratori i lokalit, shtetasi L. K., banues në Durrës.
Në hetim është vënë edhe punonjësi që merrej me mbledhjen e pagesave për llogari të subjektit, shtetasi A. H.
Materialet i janë dërguar Prokurorisë së Durrësit, ku ka nisur procedimi penal për tre vepra:
-“Fshehja e të ardhurave”
-“Moslëshimi i kuponit tatimor, dëftesës ose faturës tatimore”
-“Punësimi i paligjshëm”
Policia e Durrësit deklaron se kontrollet do të vijojnë me fokus evidentimin dhe ndëshkimin e çdo rasti të zënies së hapësirave publike apo private në kundërshtim me ligjin.
©️zërionline
