Në galerinë e artit pamor “Nikolet Vasia” është çelur ekspozita e piktorit Arben Kristani, e titulluar “Gjurmë Penelatash”. Në këtë ekspozitë janë përfshirë 52 tablo në gjininë e peizazhit, portretit dhe motiveve të tjera, të realizuara përgjatë viteve në kuadër të “Kolonisë së Piktorëve”, në zona të ndryshme, brenda dhe jashtë Shqipërisë.
Sipas autorit, veprat e përzgjedhura, kryesisht piktura në vaj që pasqyrojnë peizazhe nga treva të ndryshme të vendit, synojnë t’u dhurojnë artdashësve një përvojë të veçantë artistike, duke sjellë përpara tyre fragmente të gjalla të natyrës dhe kujtesës shqiptare.
Në hapjen e ekspozitës fundjavën e kaluar morën pjesë artdashës dhe artistë të shumtë, mes tyre edhe piktori i njohur Pashk Përvathi, i cili vlerësoi punën dhe rrugëtimin krijues të Kristanit, duke e cilësuar atë si një kontribues të rëndësishëm në artin bashkëkohor shqiptar.
Ekspozita “Gjurmë Penelatash” do të jetë e hapur për publikun deri më 25 nëntor.
©️zërionline
