Me një aksion të koordinuar dhe me hyrje të menjëhershme në disa banesa, Policia e Durrësit ka finalizuar operacionin e koduar “CLEANING 3”, duke goditur një tjetër hallkë të rrjetit të shpërndarjes së drogës në qytet. Pas një hetimi disamujor me metoda speciale, të ndjekur nga Seksioni për Hetimin e Narkotikëve në bashkëpunim me Prokurorinë e Durrësit, në pranga kanë rënë 12 persona, mes tyre edhe organizatori i grupit. Një tjetër shtetas vijon të jetë në kërkim.
Gjatë aksionit u sekuestruan kokainë, kanabis, peshore elektronike, municion luftarak, armë të ftohta dhe 16 aparate celularë.
Sipas Policisë, hetimet kanë nisur në kuadër të procedimit penal nr. 880 të këtij viti, i cili lidhet me operacionet e mëparshme “CLEANING 1” dhe “CLEANING 2”, ku gjithashtu janë arrestuar shpërndarës droge pranë gjimnazeve të Durrësit. Provat e siguruara çuan në identifikimin e personave të tjerë të përfshirë në aktivitetin kriminal, duke dokumentuar plotësisht skemën e shpërndarjes së lëndëve narkotike.
Të arrestuarit me urdhër të Gjykatës së Durrësit:
- Fabrizzio Asllanaj, 30 vjeç (organizator i dyshuar), ndaj tij rëndojnë gjithashtu akuzat për armë dhe municione pa leje, kontrabandë, fshehje të ardhurash, mospagim taksash, moslëshim kuponi tatimor dhe punësim të paligjshëm.
- Blerim Oshafi, 32 vjeç
- Aurel Prendi, 24 vjeç
- Elkid Shehu, 19 vjeç
- Taulant Dervishi, 36 vjeç
- Fatmir Canollari, 31 vjeç
- Greg Kamberi, 27 vjeç
- Indrit Hadja, 35 vjeç
- Sulejman Shahaj, 58 vjeç
- Indrit Dakavelli, 38 vjeç
- Mariglen Keçi, 29 vjeç, gjithashtu i akuzuar për prodhim/mbajtje të armëve të ftohta
- Vladimir Shehu, 20 vjeç, i akuzuar gjithashtu për prodhim/mbajtje të armëve të ftohta
Ndërkohë, është shpallur në kërkim B. M., ndaj të cilit është caktuar masa “Arrest në burg”.
Materialet e sekuestruara gjatë operacionit:
- 180 doza kokainë (100 gr)
- 620 doza marijuanë (1.25 kg)
- 2 peshore elektronike
- 16 telefona celularë
- 3 armë të ftohta
- 1 përforcues grushti
- Fishekë luftarakë
Nga hetimet rezulton se grupi vepronte kryesisht pranë shkollave të mesme në Durrës, ku shpërndante dhe shiste lëndë narkotike.
Materialet procedurale i janë kaluar Prokurorisë së Durrësit për hetime të mëtejshme.
