Spektakli “UAMD Got Talent” kulmoi mbrëmë me kurorëzimin e dy studenteve që shkëlqyen mbi pjesëmarrësit e tjerë: Migena Xhaferraj, fituese e Çmimit të Madh në kategorinë këngë dhe Adivije Hoxha, e vlerësuar me Çmimin “Muza Poetike”, vendin e dytë, për interpretimin e saj të ndjeshëm. Të dyja performancat sollën emocione të bukura në sallë, duke bërë që publiku dhe juria t’i duartrokisnin gjatë.
Në momentin e shpalljes së çmimeve, atmosfera në Qendrën Kulturore u bë elektrizuese. Rektori i UAMD, Prof. Dr. Shkëlqim Fortuzi, dorëzoi çmimet dhe u shpreh i befasuar nga niveli artistik i studentëve, duke theksuar se talenti i tyre është një pasuri që universiteti do të vijojë ta mbështesë dhe promovojë.
Mbrëmja, e moderuar nga gazetarja Kozeta Kurti, qe një festë artistike, ku skena u mbush me këngë, interpretim dramatik, muzikë instrumentale, kërcim dhe krijime origjinale. Studentët sollën energji, pasion e përkushtim, duke e kthyer eventin në një prej aktiviteteve të veçanta të 20-vjetorit të UAMD.
Ndonëse fitueset morën vëmendjen kryesore, gjithë aktiviteti ishte një dëshmi e talentit studentor dhe e rolit të universitetit si një hapësirë angazhimi ku dhe arti merr jetë.
©️zërionline
