Kryetari i degës nr. 1 të Partisë Demokratike në Durrës, Ardian Muka, ka reaguar ashpër ndaj ish-deputetit Ervin Salianji, pas deklaratave që ky i fundit ka bërë ndaj tij në disa studio televizive.
“Nuk doja të merresha me këtë klloun politik që del nga dyert e blinduara të PD-së dhe hyn nga dritarja si ‘luan’, por meqë prej ditësh endet emision më emision duke më përmendur, po i jap sot përgjigjen time”, deklaron Muka.
Ai thekson se demokratët dhe qytetarët e Durrësit “e dinë shumë mirë” se e vetmja gjë që e ka lidhur ndonjëherë me ish-kryebashkiakun Vangjush Dako janë betejat elektorale kundër tij.
“Kam qenë gjithmonë përballë Dakos, kurrë ortak në biznes. Kompania ime e betonit ka tetë vite që nuk operon, edhe për shkak të luftës së egër që ai i bënte kundërshtarëve ideologjikë dhe tregtarë”, shprehet ai.
Muka kujton disa prej përballjeve të tij politike:
- kandidimi si përfaqësues i demokratëve për bashkinë e Durrësit më 22 mars 2022, “ku PS dhe bandat bënë masakrën e radhës”;
- nismat qytetare në mbrojtje të kulturës, traditës dhe arkeologjisë së qytetit;
- qëndrimet në Këshillin Bashkiak, “ku mbroj interesat e qytetarëve pa asnjë kompromis”.
Ndërsa për Ervin Salianjin ka një listë akuzash të drejtpërdrejta. Sipas Mukës, demokratët e Durrësit do ta mbajnë mend Salianjin:
- “si negociatorin e shitjes së zgjedhjeve të vitit 2015”;
- “si koordinatori i përçarjes së votës demokrate në zgjedhjet vendore 2022”;
- “si njeriun që prishi procesin e denoncimit të PD-së ndaj kryetarit të komisionit të ligjeve, Xhafaj, me historitë e tij ‘Babale’”.
Ai akuzon gjithashtu se Salianji po përpiqet të zhvendosë vëmendjen e demokratëve nga beteja ndaj qeverisë te mbledhje me “punëtorë rimorkiatoresh, taksistë apo roje sigurie”, të gjithë njerëz të nderuar, thekson Muka, por që “nuk kanë asnjë lidhje strukturore me PD-në e Durrësit”.
Muka nënvizon se debati për ndryshimet e nevojshme në PD, njerëzore, strukturore dhe organizative është i drejtë dhe duhet të hapet sa më shpejt brenda partisë, por jo të përdoret si flamur nga “njerëzit e gabuar”.
“Çfarëdo të ndodhë, zoti Salianji, ju do të mbaheni mend si njeriu që me shkop në dorë goditët demokratët që mendonin ndryshe nga ju”, përfundon reagimi.
©️zërionline
