“Të gjithë, mësues, mjekë e qytetarë duhet ta dinë se nesër mund të ketë një Erion tjetër. Thikat mbi Erionin janë në çdo zemër shqiptari sot”, u shpreh me dhimbje dhe zhgënjim halla e tij, Barie Çupi, e cila mbërriti sot në sheshin “Liria” në Durrës për t’iu bashkuar protestës së paralajmëruar në rrjetet sociale. Por sheshi ishte thuajse bosh.
Protesta, e thirrur në orën 11:00 për të kërkuar drejtësi për 15-vjeçarin Erjon Boba, i cili u godit me thikë më 25 nëntor, në zonën e ish-Kënetës, dhe humbi jetën pas nëntë ditësh në spital. Vetëm 3-4 adoleshentë u shfaqën, por u larguan pasi panë mungesën e pjesëmarrësve të tjerë. Në shesh erdhën e mbetën pak veta, mes tyre halla e viktimës, ndërsa prania e mediave dhe policisë ishte më e madhe se ajo e qytetarëve.
“Erioni ishte prerë në besë. Nëse je djalë i mirë, rrezikon të vritesh”
E shtrënguar nga dhimbja, por edhe nga zhgënjimi, Barie Çupi foli hapur për gjendjen e shoqërisë:
“Erioni ishte edukuar me punë. E vërteta e dhimbshme është se ai është prerë në besë nga kjo shoqëri. Sot, nëse një fëmijë është djalë i mirë, rrezikon të vritet nga një fëmijë prindërit e te cilit nuk janë marrë me edukimin e tij. Shteti duhet të tronditet. Ky është një tërmet kur arrijnë të vriten fëmijët. Nuk ka asgjë më të rëndë se kjo.”
Ajo nënvizoi se indiferenca e shoqërisë është po aq e dhimbshme sa vetë humbja. Për të, ky rast duhet të kishte qenë një kambanë alarmi, një moment bashkimi – jo braktisjeje.
Arsyeja e boshllëkut: orari mësimor dhe mungesa e iniciativës nga shkollat
Sipas hallës së Erionit, një nga arsyet e mospjesëmarrjes së nxënësve ishte fakti se protesta u zhvillua gjatë procesit mësimor, ndërsa mësuesit dhe prindërit – që duhej t’i shoqëronin – nuk kanë ndërhyrë:
“Ata duhet të ishin këtu. Mësuesit duhej të na bashkoheshin, të udhëhiqnin fëmijët. Duhej të ishte një thirrje e përbashkët. Por askush nuk lëvizi.”
“Po rritet jo një brez edukativ, por agresiv”
Edhe Shaqir Çerpja, i afërt me familjen Boba, nënvizoi me tone të forta se krimi mes të miturve është pasojë e një shoqërie që ka humbur orientimin:
“Po jetojmë në një shoqëri depresive dhe indiferente. Nuk reagojmë për asgjë. Kur shkojnë në shkollë, nxënësit nuk marrin libra e fletore, por thika dhe municione. Askush nuk interesohet çfarë bën fëmija i vet.”
Sipas tij, mungesa e solidaritetit është tregues i një krize të thellë kulturore, morale dhe institucionale.
Një jetë e ndërprerë brutalisht
Erjon Boba, nxënës i gjimnazit “Dom Nikollë Kaçorri”, u plagos me thikë më 25 nëntor nga një 14-vjeçar, M. Kllogjeri. Ai qëndroi për ditë me radhë në reanimacion, fillimisht në spitalin e Durrësit dhe më pas në QSUT, por nuk mundi t’i mbijetonte plagëve.
Ngjarja ka tronditur opinionin publik, por protesta që duhej të shprehte reagimin e shoqërisë u kthye në një demonstrim të heshtjes dhe ndarjes sociale.
Ky është një tregues i frikshëm se sa lehtë mund të shuhet zëri i drejtësisë nëse heshtja kolektive bëhet normë, pasi siç u shpreh halla e Erionit:
“Nesër mund të ketë një Erion tjetër.”
©️zërionline
