“Junior Eurovision Song Contest 2025” u mbyll mbrëmjen e kaluar dhe Franca u kurorëzua fituese e edicionit, pas një gare të fortë me Ukrainën.
Fituesja e madhe e këtij edicioni është këngëtarja franceze Lou Deleuze me këngën “Ce Monde”. Ajo arriti të triumfojë në një përballje që u cilësua si “fotofinish” për shkak të diferencës së ngushtë dhe garës së fortë me përfaqësuesen e Ukrainës.
Ndërkaq, përfaqësuesja e Shqipërisë, Kroni Pula, ka arritur një rezultat mjaft dinjitoz, duke e pozicionuar vendin tonë në vendin e 6-të mes 18 shteteve pjesëmarrëse në finale. Me këngën “Fruta Perime”, Kroni dhuroi një performancë të bukur vokale dhe skenike, e cila u duartrokit në sallë, duke grumbulluar në total 145 pikë.
Votimi i këtij viti solli mbështetje të gjerë për Shqipërinë. Një moment kulminant ishte vlerësimi maksimal nga vetë fituesi i festivalit; juria e Francës i dha Shqipërisë 12 pikë. Pikë të rëndësishme për Kroni Pulën erdhën gjithashtu nga juritë e Ukrainës, Holandës, Polonisë, Malit të Zi, Portugalisë, Spanjës dhe Gjeorgjisë.
Mbështetja për këngën shqiptare ishte masive edhe në votimin online. Nga votat e publikut, Shqipëria mori 85 pikë, duke u ngjitur në tabelën përfundimtare.
©️zërionline
