Nisi si një projekt inovator i inteligjencës artificiale, por është kthyer tashmë në një betejë të fortë ligjore që ka përfshirë aktoren shqiptare dhe institucionet e shtetit. Aktorja Anila Bisha ka dorëzuar zyrtarisht një padi në Gjykatën Administrative, duke paditur Këshillin e Ministrave, kompaninë “Apel” dhe AKSHI-n, për përdorimin e imazhit të saj për krijimin e “ministres” virtuale, Diella.
Në padinë e saj, aktorja 57-vjeçare kërkon marrjen e një mase sigurimi të menjëhershme: ndalimin e përdorimit të imazhit të saj deri në përfundimin e procesit gjyqësor. Argumenti kryesor i Bishës lidhet me tejkalimin e kontratës. Sipas dokumentacionit, aktorja kishte dhënë leje që imazhi i saj të përdorej si asistente virtuale në platformën e-Albania deri më 31 dhjetor 2025. Ndërkaq, përdorimi i këtij avatari si “Ministre e Prokurimeve Publike”, një post politik i prezantuar me bujë nga kryeministri Edi Rama, nuk ka qenë pjesë e marrëveshjes fillestare.
Edhe pse fillimisht e mori me sportivitet “emërimin” e saj si ministre virtuale, Bisha theksoi se pagesa që kishte marrë ishte vetëm për shërbimet e e-Albanias dhe jo për rolin e ri politik që iu dha avatarit të saj.
Gjatë rrëfimit të saj, aktorja tregoi për punën voluminoze që i ishte dashur për të “ngjallur” Diellën, duke regjistruar orë të tëra tekstesh dhe duke kaluar procese të lodhshme teknike për të sinkronizuar zërin dhe lëvizjet e gojës. Megjithatë, ajo që nisi si një bashkëpunim korrekt me AKSHI-n, duket se u kris kur imazhi i saj u përdor si pjesë e kabinetit të ri në Asamblenë e Partisë Socialiste.
Ministrja “Diella” u prezantua më 11 shtator si një risi që do të revolucionarizonte administratën. Kryeministri Rama madje shkoi më tej, duke deklaruar se Diella do të zhvillonte edhe “fëmijët” e saj virtualë, të cilët do të synonin të asistonin 83 deputetët e mazhorancës në komunikim.
Fati i “ministres” më të përfolur varet nga gjykimi dhe vendimi i Gjykatës Administrative. Nëse gjykata pranon kërkesën e Anila Bishës, qeverisë do t’i duhet të “shkarkojë” përkohësisht ministren e saj digjitale, duke krijuar një precedent unik në Shqipëri mbi të drejtën e autorit dhe mbrojtjen e imazhit në epokën e inteligjencës artificiale.
©️zërionline
