Trupa profesioniste e Teatrit “Aleksandër Moisiu”, së bashku me regjisorët, zhvilloi këtë të mërkurë workshop-in e parë me nxënës të shkollave të mesme të qytetit, duke i përfshirë drejtpërdrejt në procesin krijues. Aktorë të njohur të trupës së Durrësit si Gentian Zenelaj, Suela Bako, Andia Xhunga, Alesia Xhemali, Amos Zaharia etj. biseduan me nxënësit pjesëmarrës mbi sfidat dhe kënaqësitë që ofron vënia në skenë e një vepre. Në workshop morën pjesë dhe drejtorja e teatrit Alketa Tragaj dhe drejtorja e ZVA Durrës Amarilda Thërrmija.
Gjatë takimit, nxënësit u njohën nga afër me trupën artistike, regjisorë, aktorë, skenograf/kostumograf, si dhe me rrugëtimin e një produksioni teatral, duke nisur nga ideja për të mbërritur te prova e më tej në realizimin skenik.
Në fillim të muajit, teatri hapi thirrjen për pjesëmarrjen në teatrin e gjimnazeve
“Moisiu i Ri”, duke ftuar nxënës të shkollave të mesme publike dhe private të bëhen pjesë e projektit.
Të rinjtë do të bashkëpunojnë me aktorë dhe regjisorë profesionistë duke përjetuar dhe provuar një proçes të bukur krijues që do të sjellë dhe realizimin e
5–6 shfaqjeve teatrore, mes të cilave do të shpallen dhe 3 më të mirat.
Teatri “A. Moisiu” njofton se pas këtij workshopi të parë projekti vijon me fazën intensive të punës, ku do të zhvillohen provat dhe përgatitja e shfaqjeve.
©️zërionline
