Shqipëria shënon sot fillimin zyrtar të shtrirjes kombëtare të WiFi-t publik falas, në kuadër të nismës WiFi4WB (WiFi për Ballkanin Perëndimor). Ceremonia zhvillohet sot, më 13 shkurt 2026, në Kalanë e Krujës, duke simbolizuar një hap të rëndësishëm drejt përshpejtimit të transformimit digjital në vend.
Aktiviteti mbledh përfaqësues nga Delegacioni i Bashkimit Evropian në Shqipëri, Ambasada Gjermane në Shqipëri, Deutsche Gesellschaft für Internationale Zusammenarbeit (GIZ), si dhe përfaqësues të qeverisë shqiptare dhe autoriteteve vendore. Të pranishëm janë edhe aktorë kyç të kësaj nisme, e cila synon pajisjen me WiFi publik falas të hapësirave si sheshe, parqe, biblioteka, muze dhe shkolla në të 61 bashkitë e vendit.
WiFi4WB është pjesë e projektit EU4Digital (BE për Digjitalizimin), bashkëfinancuar nga Bashkimi Evropian dhe Qeveria Gjermane, dhe zbatuar nga GIZ. Nisma parashikon pajisjen me WiFi publik falas të rreth 500 bashkive në Ballkanin Perëndimor, si pjesë e një plani më të gjerë për përshpejtimin e tranzicionit digjital në rajon.
Përmes kësaj nisme synohet forcimi i aksesit në internet për qytetarët, rritja e përfshirjes digjitale dhe afrimi i mëtejshëm i Ballkanit Perëndimor me Tregun unik digjital të Bashkimit Evropian.
©️zërionline
