Sot, Kosova shënon Ditën e Pavarësisë, një nga datat më të rëndësishme në historinë moderne të saj. Më 17 shkurt 2008, në një seancë solemne në Prishtinë, Kuvendi shpalli pavarësinë, duke e bërë Kosovën shtet të pavarur dhe sovran.
Shpallja e pavarësisë erdhi pas një procesi të gjatë politik e diplomatik, i cili pasoi luftën e viteve 1998–1999 dhe ndërhyrjen e NATO-s kundër forcave serbe. Pas përfundimit të luftës, Kosova u vendos nën administrimin e UNMIK-ut, ndërsa statusi përfundimtar u diskutua për vite me radhë në tryeza ndërkombëtare.
Më 17 shkurt 2008, në prani të deputetëve dhe përfaqësuesve ndërkombëtarë, u lexua Deklarata e Pavarësisë nga kryeministri i atëhershëm Hashim Thaçi. Që nga ajo ditë, Kosova ka ndërtuar institucionet e saj, ka miratuar Kushtetutën dhe ka konsoliduar funksionimin e shtetit.
Deri më sot, pavarësia e Kosovës është njohur nga mbi 110 shtete në botë, përfshirë Shtetet e Bashkuara të Amerikës dhe shumicën e vendeve të Bashkimit Evropian. Megjithatë, procesi i njohjeve mbetet një sfidë diplomatike, ndërsa dialogu me Serbinë vazhdon nën ndërmjetësimin e Bashkimit Evropian.
Këtë 17 Shkurt, në Prishtinë dhe në qytete të tjera të vendit organizohen aktivitete festive, homazhe dhe ceremoni shtetërore. Flamujt kuqezi dhe ai i Kosovës valëviten në institucione dhe në sheshe, ndërsa qytetarët kujtojnë sakrificat dhe rrugëtimin e gjatë drejt shtetësisë.
Në të njëjtën kohë, një nga temat kryesore të opinionit publik mbetet gjykimi në Hagë i katër ish-udhëheqësve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Procesi gjyqësor, i cili ka nisur në vitin 2023 për krime lufte dhe krime kundër njerëzimit, është aktualisht në fazën përmbyllëse, me seancat për argumentet përfundimtare që u mbajtën në fillim të shkurtit, ndërsa trupi gjykues ka deri në rreth 90 ditë për të shpallur vendimin e shkallës së parë.
Dita e Pavarësisë është një moment reflektimi për sfidat e së shkuarës dhe për përgjegjësinë ndaj së ardhmes. Për shumë qytetarë, 17 Shkurti mbetet simbol i lirisë, vetëvendosjes dhe aspiratës për integrim euroatlantik.
Një ditë ku të gjithë bëhen bashkë për të nderuar këtë moment historik dhe ata që sakrifikuan dhe kontribuan për këtë, duke nisur nga figura të shquara si Ibrahim Rugova, Adem Jashari etj.
Gëzuar sot e gjithmonë Kosovë!
©️zërionline
