Specialistët për Hetimin e Krimeve Ekonomiko-Financiare kanë ekzekutuar masën e sigurisë “Arrest me burg” për dy shtetas, në kuadër të operacionit të koduar “Eko-Toxic”, i cili lidhet me veprimtari të dyshuara të paligjshme në fushën e menaxhimit të mbetjeve dhe krimeve financiare.
Bëhet fjalë për shtetasin turk Yusuf Sezai Kurum, 39 vjeç, dhe shtetasin Arif Shkalla, 48 vjeç, banues në Tiranë. Masa e sigurisë është caktuar nga Gjykata e Durrësit, pas hetimeve të zhvilluara mbi një sërë veprash penale që përfshijnë shkelje të rënda ligjore në sektorin ekonomik dhe atë mjedisor.
Sipas organit të akuzës, shtetasi Yusuf Kurum, i identifikuar si përfaqësues me prokurë i administratorit të shoqërisë “Kurum International” sh.a., dyshohet për veprat penale “Menaxhimi i mbetjeve” dhe “Pastrimi i produkteve të veprimtarisë kriminale”.
Ndërkohë, shtetasi Arif Shkalla, gjithashtu përfaqësues me prokurë i administratorit të së njëjtës shoqëri dhe me detyrë drejtor finance, akuzohet për një gamë më të gjerë veprash penale, përfshirë “Kontrabanda me mallra të ndaluara ose të kufizuara”, “Transportimi i mbetjeve”, “Falsifikimi i dokumenteve” dhe “Pastrimi i produkteve të veprimtarisë kriminale”.
Operacioni “Eko-Toxic” vjen si pjesë e përpjekjeve të intensifikuara të strukturave ligjzbatuese për të goditur krimet që lidhen me ndotjen mjedisore dhe aktivitetet e paligjshme ekonomike, të cilat jo vetëm cenojnë konkurrencën e ndershme në treg, por edhe paraqesin rrezik për shëndetin publik dhe mjedisin.
Hetimet për këtë çështje vijojnë, ndërsa pritet që autoritetet të zbardhin më tej rrjetin dhe mekanizmat e përdorur në këtë aktivitet të dyshuar kriminal.
©️zërionline
