Një ngjarje e pazakontë që fillimisht u raportua si mister në varrezat e qytetit të Lushnjës ka filluar të marrë drejtim hetimor, pas sqarimeve paraprake të Policisë.
Rreth orës 10:00 të mëngjesit, roja i varrezave, shtetasi O. R., ka konstatuar dëmtime në pjesën e sipërme të një varri, duke ngritur menjëherë dyshime për një ndërhyrje të qëllimshme. Pas verifikimeve të para në terren, shërbimet e policisë kanë nisur punën për identifikimin e autorit të mundshëm dhe sqarimin e rrethanave të ngjarjes.
Sipas informacionit paraprak të policisë, dyshohet se dëmtimi i varrit është kryer nga shtetasi Edison Ngresi, 36 vjeç, i cili rezulton se vuan nga probleme të shëndetit mendor. Ky element shihet si thelbësor në hetimin e rastit, duke e zhvendosur fokusin nga një ngjarje me motive të paqarta, në një situatë që lidhet me gjendjen shëndetësore të personit të dyshuar.
Menjëherë pas identifikimit, shtetasi E. Ngresi është shoqëruar nga shërbimet e Policisë në ambientet e Komisariatit të Lushnjës, ku po kryhen veprimet e mëtejshme procedurale. Ndërkohë, grupi hetimor vijon punën për dokumentimin e plotë të rrethanave dhe verifikimin e çdo detaji që lidhet me ngjarjen, për të hedhur dritë mbi mënyrën dhe arsyet e dëmtimit të varrit.
Rasti tërheqi vëmendjen e opinionit publik, ndërsa priten detaje të tjera në vijim.
©️zërionline
