Një aksion i befasishëm nga ana e Drejtorisë së Përgjithshme të Burgjeve është zhvilluar në burgun e Fushë-Krujës. Në aksion morën pjesë Drejtori i Përgjithshëm i Burgjeve, Adriatik Kupi, së bashku me Drejtorin e Policisë së Burgjeve, Paulin Rajta, si dhe 10 furgonë me forca të Policisë së Burgjeve.
Kontrolli nisi në orën 17:30 dhe përfundoi në 19:30. Drejtoria e Përgjithshme e Burgjeve njofton se gjatë operacionit u konstatuan dhe u sekuestruan 3 telefona celularë, 3 ora/telefon, mjete të improvizuara të mprehta dhe sende të tjera të palejuara.
Aksioni është në vazhdën e aksioneve të zhvilluara në burgjet e tjera të vendit dhe objektiv janë sendet e kundërligjshme si: ‘thika të improvizuara, telefona, lëndë narkotike etj.’
Reagimi i Drejtorisë së Përgjithshme të Burgjeve:
Aksion blic në IEVP Fushë-Krujë.
Drejtori i Përgjithshëm i Burgjeve, z. Adriatik Kupi, së bashku me Drejtorin e Policisë së Burgjeve, Drejtues i Larte Paulin Rajta, zhvilluan një kontroll të befasishëm dhe të plotë në ambientet e institucionit, duke vendosur një standard të qartë për zbatimin e ligjit dhe disiplinës.
Kontrolli nisi në orën 17:30 dhe përfundoi në 19:30. Gjatë operacionit u konstatuan dhe u sekuestruan 3 telefona celularë, 3 ora/telefon, mjete të improvizuara të mprehta dhe sende të tjera të palejuara.
Ky aksion është një mesazh i drejtpërdrejtë dhe pa ekuivok:
– çdo tentativë për të cenuar sigurinë, rendin dhe rregullin në institucionet e vuajtjes së dënimit do të goditet menjëherë dhe pa kompromis.
Kontrollet do të vijojnë me intensitet të lartë në të gjitha IEVP-të. Askush nuk është mbi rregullat. Përgjegjësia do të jetë individuale dhe institucionale. Toleranca është zero.
©️zërionline
