Një nga zbulimet më të rëndësishme që doli ne pah nga puna e fizikantit David Gross është “plazma kuark-gluon”, një gjendje materieje me temperaturë të paimagjinueshme, që besohet të ketë ekzistuar në momentet e para të krijimit të universit. Ky zbulim ndihmon shkencëtarët të kuptojnë se si nisi gjithçka pas Big Bengut dhe si u formua materia që përbën universin sot. Pikërisht kjo temë ishte edhe në qendër të videos fituese të këtij viti në “Breakthrough Junior Challenge”, një konkurs global videosh për nxënës të shkollave të mesme.
Bashkëthemeluesja e “Breakthrough Prize”, Julia Milner, së bashku me krijuesin e njohur të videove shkencore Mark Rober, i dorëzuan çmimin 18-vjeçares Matea Cañizares nga Quito, Ekuador.
Pas transmetimit të videos emocionuese ku ajo mësonte lajmin e fitores, Matea u ngjit në skenë dhe tha:
“Jam rritur pranë diellit, në 10 mijë këmbë lartësi mbi ekuator. Aq pranë një ylli që shpërthen energji, sa mund të ndjesh se ai mban historinë e origjinës së universit.”
Ajo ia kushtoi çmimin frymës së bashkëpunimit ndërkombëtar, duke theksuar:
“Ne varemi nga kureshtja dhe talentet unike të njëri-tjetrit për të vazhduar zgjerimin e njohurive tona.”
Kjo është veçanërisht e rëndësishme, sepse tregon se përparimi shkencor nuk vjen nga puna e një personi të vetëm, por nga bashkëpunimi mes studiuesve, të rinjve dhe vendeve të ndryshme të botës. Zbulime si plazma kuark-gluon ndihmojnë njerëzimin të kuptojë origjinën e universit, ligjet e natyrës dhe zhvillimin e teknologjive të reja që mund të ndikojnë në të ardhmen e njerëzimit.
Ceremonia e 12-të e “Breakthrough Prize” nderoi shkencëtarë që kanë realizuar arritje të mëdha në terapinë gjenetike, sëmundjet neurodegjenerative, teoritë mbi grimcat dhe forcat themelore të universit, si edhe matematikën e sistemeve kritike. E njohur në mbarë botën si “Oscars® i Shkencës”, ceremonia mblodhi figura të njohura nga shkenca, teknologjia, biznesi, arti dhe industria e argëtimit, së bashku me fitues të mëparshëm të çmimit, për të festuar progresin shkencor dhe njerëzit që e bëjnë atë të mundur.
Eventi u zhvillua në Los Angeles dhe u moderua për herë të katërt nga aktori dhe fituesi i Emmy-t James Corden. Gjatë mbrëmjes, ai solli momente humori duke kujtuar se filmat e Hollivudit jo gjithmonë i kanë marrë seriozisht shkencëtarët, ndaj “Breakthrough Prize” synon pikërisht t’i vendosë në qendër të vëmendjes zbulimet shkencore që ndryshojnë botën.
Në total u dhanë gjashtë çmime “Breakthrough”, me vlerë 3 milionë dollarë secili, në fushat e Shkencave të Jetës, Fizikës Fundamentale dhe Matematikës. Vetëm këtë vit, fondi total i çmimeve arriti në 18.75 milionë dollarë, ndërsa në 15 vite ekzistencë janë shpërndarë mbi 340 milionë dollarë për shkencëtarë dhe studiues në mbarë botën.
