Mbrëmja e së martës është shënuar nga një tjetër aksident tragjik në rrugët e vendit. Një 28-vjeçar ka humbur jetën në mënyrë të menjëhershme pas një përplasjeje të fortë mes një automjeti dhe një motomjeti në zonën e Sukthit, ndërsa drejtuesi i makinës është vënë në prangat e policisë.
Ngjarja e rëndë ndodhi rreth orës 23:45 në rrugën që lidh Sukthin me Rrushkullin, në lagjen Stalla. Sipas informacioneve paraprake të policisë, automjeti i drejtuar nga shtetasi M.V., 19 vjeç, është përplasur me motomjetin që drejtohej nga A.SH., 28 vjeç.
Përplasja ka qenë fatale për të riun, i cili për shkak të plagëve të rënda ka ndërruar jetë në vendngjarje, pa mundur t’u mbijetojë dëmtimeve të marra.
Menjëherë pas aksidentit, në vendin e ngjarjes kanë mbërritur shërbimet e policisë dhe grupi hetimor, të cilët kanë kryer veprimet e para procedurale dhe kanë nisur hetimet për zbardhjen e plotë të rrethanave dhe dinamikës së aksidentit.
Policia bëri me dije se drejtuesi i automjetit, 19-vjeçari M.V., është arrestuar dhe po merret në pyetje lidhur me ngjarjen. Ndërkohë, hetimet vijojnë për të përcaktuar shkaqet që çuan në këtë aksident fatal që i mori jetën 28-vjeçarit.
©️zërionline
