Puna dhe standardet e trajtimit të personave të privuar nga liria në Institucionin e Ekzekutimit të Vendimeve Penale (IEVP) Durrës kanë qenë në fokus të një vizite monitoruese të zhvilluar nga Komisioni Parlamentar për të Drejtat e Njeriut dhe Mjetet e Informimit Publik, në bashkëpunim me përfaqësues të Avokatit të Popullit.
Gjatë inspektimit, anëtarët e delegacionit, mësohet se u njohën nga afër me kushtet e akomodimit, shërbimet që ofrohen për të dënuarit dhe paraburgosurit, si edhe programet rehabilituese që zbatohen në institucion me synim riintegrimin e tyre në shoqëri.
Vizita u zhvillua në kuadër të misionit mbikëqyrës të institucioneve përgjegjëse për garantimin e respektimit të të drejtave të personave të privuar nga liria dhe monitorimin e standardeve të trajtimit në sistemin penitenciar.
Një pjesë e veçantë e vizitës iu kushtua edhe aktiviteteve të organizuara me rastin e 1 Qershorit për fëmijët e personave që vuajnë dënimin në këtë institucion, duke vënë theksin te rëndësia e ruajtjes së lidhjeve familjare dhe mbështetjes sociale.
Sipas drejtuesve të IEVP Durrës, institucioni vijon të mbetet i angazhuar në përmirësimin e kushteve, forcimin e programeve rehabilituese dhe respektimin e dinjitetit njerëzor në përputhje me standardet ligjore dhe ato ndërkombëtare.
©ZëriOnline
