Një aksident i rëndë është regjistruar pak minuta më parë në autostradën Durrës-Tiranë, pranë zonës së QTU-së, ku një autobuz me pasagjerë i linjës Berat-Tiranë ka dalë nga rruga dhe ka përfunduar në kanalin anësor.
Dyshohet, drejtuesi i mjetit ka humbur kontrollin dhe mjeti është përmbysur jashtë karrexhatës.
Si pasojë e aksidentit raportohet se kanë humbur jetën dy persona, shoferi dhe një pasagjer, ndërsa 15 të tjerë kanë mbetur të plagosur. Një fëmijë raportohet se është në gjendje të rëndë dhe po marrin ndihmën e parë në spital.
Drejtori i Policisë Rrugore, Perlat Vatoci në një prononcim për mediat tha se 15 persona kanë mbetur të plagosur nga përmbysja e autobusit i linjës Berat-Tiranë dhe anasjelltas.
“Janë 15 të plagosur, një fëmijë në gjendje të rëndë. Paraprakisht dyshohet humbje e kontrollit. Policia e Shtetit apelon që të gjithë të respektojnë rregullat e qarkullimit. Autobusi është lincesuar për transportin e pasagjerëve, Berat-Tiranë dhe anasjelltas. Ngjarja është në hetim e sipër”, tha Drejtori i Policisë Rrugore.
Dyshohet se drejtuesi i mjetit ka pësuar infarkt dhe ka humbur kontrollin. Autobusi ka thyer barrierat mbrojtëse dhe ato jane futur mes përmes autobusit.
Gjithsesi, zyrtarisht shkaqet dhe rrethanat e ngjarjes mbeten ende të paqarta.
©ZëriOnline
