Jo vetëm në rrugë, edhe në det mjetet e ndihmojnë njëra-tjetrën kur kanë avari.
Një operacion rimorkimi është zhvilluar në det të hapur nën drejtimin e Kapitenerisë së Portit të Durrësit, për t’i ardhur në ndihmë jahtit “Infinity Nine”, i cili lundron nën flamurin e Maltës.
Sipas informacioneve zyrtare nga Kapiteneria e Portit, mjeti lundrues ka kërkuar ndihmë pas një defekti të pësuar në motorë, rreth 20 milje në perëndim të Bishtit të Pallës.
Për shkak të pozicionit të jahtit, Kapiteneria ka koordinuar ndërhyrjen me anijen “Nautica“, e cila ndodhej në lundrim e sipër në atë rajon detar. Anija në fjalë, në pronësi të kompanisë “Albsea Transport”, kishte si destinacion Portin e Durrësit dhe ka kryer manovrën e rimorkimit të jahtit.
Sipas autoriteteve portuale, mjeti lundrues pritet të mbërrijë rreth mesnatës në radën e portit të Durrësit.
Kapiteneria e Portit dhe autoritetet detare kanë shprehur mirënjohje për ekuipazhin e m/v “Nautica”, duke vlerësuar gatishmërinë dhe profesionalizmin e treguar gjatë asistencës në det.
©ZëriOnline
