Një zjarr i përmasave të mëdha shpërtheu mesditën e së shtunës në fshatin Bardhet, njësia administrative Qafë Mali, në bashkinë Fushë-Arrëz, duke përfshirë një sipërfaqe të konsiderueshme me pyje pishe dhe duke iu afruar banesave të zonës.
Sipas të dhënave paraprake, flakët u përhapën me shpejtësi për shkak të erës së fortë dhe temperaturave të larta, duke rritur rrezikun për banorët.
Në operacionin për shuarjen e zjarrit u angazhuan banorët e fshatit, shërbimi pyjor dhe efektivët e zjarrfikëses së Fushë-Arrëzit. Për shkak të përmasave të vatrës, në ndihmë u thirrën edhe forcat zjarrfikëse nga Puka.
Burime paraprake bëjnë me dije se zjarri dyshohet të jetë shkaktuar nga pakujdesia e disa fëmijëve pranë një banese në lagjen Bardhet. Lidhur me ngjarjen, policia ka shoqëruar në komisariat babanë e tyre, ndërsa hetimet vijojnë për të zbardhur plotësisht rrethanat dhe për të përcaktuar shkakun e saktë të zjarrit.
Aktualisht, flakët janë vënë nën kontroll, por autoritetet po mbajnë nën monitorim zonën, pasi era mund të favorizojë riaktivizimin e vatrave.
Pyjet e Pukës dhe Fushë-Arrëzit konsiderohen ndër më të rrezikuarat gjatë sezonit veror për shkak të bimësisë së dendur dhe sipërfaqeve të mëdha me pishë të zezë, e cila favorizon përhapjen e shpejtë të flakëve.
©ZëriOnline
