Një simbol i ri i është shtuar hapësirës publike të Durrësit, me synimin për të promovuar historinë, kulturën dhe vlerat turistike të qytetit bregdetar.
Instalacioni “I ❤ Durrës” është vendosur në shëtitoren bregdetare “Taulantia” dhe është realizuar nga skulptorët durrsakë Ibrahim Reçi, Amarildo Reçi dhe Ergys Reçi. Vepra është konceptuar si një pikë e re referimi për qytetarët dhe vizitorët, të cilët mund të ndalen për fotografi dhe të krijojnë kujtime nga qëndrimi i tyre në Durrës.
Përtej një elementi dekorativ, instalacioni synon të përcjellë lidhjen e fortë të qytetit me detin, trashëgiminë mijëravjeçare dhe komunitetin që i jep jetë çdo ditë.
Vendosja e tij në një nga zonat më të frekuentuara të shëtitores pritet ta kthejë këtë hapësirë në një pikë të re takimi dhe një element identifikues për Durrësin, duke i shtuar një tjetër atraksion peizazhit urban dhe turistik të qytetit.
©ZëriOnline
