Një zjarr është regjistruar pasditen e sotme në zonën e Ujit të Ftohtë në Vlorë, pranë tunelit, duke përfshirë një kabinë të ujësjellësit që shërben për shpërndarjen e ujit në zonë.
Sipas informacioneve paraprake, dyshohet se zjarri ka nisur në pjesën kodrinore dhe më pas flakët janë përhapur në drejtim të kabinës së ujësjellësit.
Momenti kur shpërthen në flakë kabina
Në vendngjarje kanë mbërritur forcat zjarrfikëse, të cilat po punojnë për izolimin e vatrës dhe shuarjen e flakëve, me qëllim shmangien e përhapjes së mëtejshme të zjarrit.
Situata paraqet rrezik për shkak të afërsisë së vatrës me zonën e banuar dhe turistike të Ujit të Ftohtë. Pranë zonës së prekur nga flakët ndodhen objekte, banesa dhe hotele, çka e bën ndërhyrjen për izolimin e zjarrit veçanërisht të rëndësishme.
Forcat zjarrfikëse vijojnë ndërhyrjen në terren për të vënë situatën nën kontroll.
Ende nuk dihen shkaqet e sakta të rënies së zjarrit, ndërsa pritet që rrethanat të sqarohen pas ndërhyrjes së autoriteteve dhe verifikimeve në terren.
Deri në këto momente nuk janë dhënë të dhëna të tjera zyrtare lidhur me dëmet e shkaktuara apo nëse zjarri ka ndikuar në funksionimin e sistemit të shpërndarjes së ujit në zonë.
©ZëriOnline
