Zjarri vijon të jetë aktiv në masivin pyjor të Parkut Kombëtar Lurë-Mali i Dejës. Era e fortë dhe bimësia e dendur po favorizojnë përhapjen e flakëve, ndërsa dy helikopterë dhe rreth 20 forca po ndërhyjnë nga ajri dhe toka për shuarjen e vatrës.Një vatër zjarri vijon të jetë aktive në masivin pyjor të Parkut Kombëtar Lurë-Mali i Dejës, ndërsa flakët po përhapen me shpejtësi për shkak të erës së fortë dhe bimësisë së dendur.
Për shuarjen e zjarrit janë angazhuar rreth 20 forca, mes tyre zjarrfikës, punonjës të Bashkisë Dibër, punonjës të zonave të mbrojtura dhe vullnetarë të zonës.Operacionit në terren i janë bashkuar edhe dy helikopterë, të cilët po ndërhyjnë nga ajri për neutralizimin e flakëve dhe kufizimin e përhapjes së tyre në pjesë të tjera të parkut.
Vatra ndodhet në një masiv me pishë të zezë, një nga sipërfaqet e pakta të këtij lloji që kanë mbetur në Parkun Kombëtar Lurë-Mali i Dejës. Pyjet e kësaj zone janë dëmtuar ndër vite nga prerjet dhe zjarret e përsëritura.
Përballë përhapjes së flakëve, banorët e zonës kanë kërkuar angazhim maksimal të strukturave përgjegjëse, me qëllim vendosjen sa më shpejt të zjarrit nën kontroll dhe parandalimin e përhapjes së tij në sipërfaqe të tjera të parkut.
©ZëriOnline
