Vetëm pak ditë më parë kishin kurorëzuar dashurinë e tyre. Kleo Vrioni, emigrant prej vitesh në Itali, ishte kthyer në Shqipëri këtë gusht për pushime dhe për të festuar martesën me Sarën, 26-vjeçaren me origjinë italiane. Por ajo që duhej të ishte një periudhë gëzimi u kthye në tragjedi.
Çifti po kthehej gjatë natës nga një lokal, kur automjeti tip BMW me të cilin udhëtonin u përplas me një strukturë betoni në anë të rrugës, në Manzë të Durrësit. Dyshohet se drejtuesi i automjetit, 25-vjeçari Kleo Vrioni, humbi kontrollin e drejtimit.
Përplasja ishte fatale. Në vendngjarje humbën jetën Kleo Vrioni, bashkëshortja e tij Sara Brugentelli dhe 15-vjeçari Alvi Muhaxhiri, të cilët ndodheshin në automjet.
Dy të rinj të tjerë që udhëtonin me ta, Rejsi Vrioni, 25 vjeç, dhe Klevis Dervishi, 16 vjeç, mbetën të plagosur. Ata u transportuan për ndihmë mjekësore në Tiranë. 16-vjeçari Dervishi raportohet në gjendje të rëndë shëndetësore, ndërsa Rejsi Vrioni është jashtë rrezikut për jetën.
Një udhëtim i zakonshëm kthimi pas një mbrëmjeje argëtuese u ndërpre tragjikisht në rrugën dytësore Manëz-Kullë, duke shuar jetën e tre personave dhe duke lënë pas familje të tronditura.
Grupi hetimor vijon punën për të përcaktuar me saktësi dinamikën e aksidentit dhe shkaqet që çuan në humbjen e kontrollit të automjetit.
©ZëriOnline
