Një sasi prej rreth 80 kilogramësh kanabis e llojit “Gelato”, me përmbajtje të lartë THC dhe me vlerë tregu rreth 1 milion euro, është sekuestruar në Portin e Durrësit.
Operacioni i koduar “Anchor” ka çuar në arrestimin e tre shtetasve kosovarë dhe shpalljen në kërkim të dy personave të tjerë, të dyshuar për trafik ndërkombëtar të narkotikëve.
Hetimi i zhvilluar me metoda speciale ka zbardhur, sipas policisë, një skemë të dyshuar të trafikut të kanabisit nga Kanadaja drejt Shqipërisë dhe më tej drejt Kosovës.
Në Portin e Durrësit u sekuestruan 127 pako me lëndën narkotike, e cila dyshohet se ishte siguruar në Ontario të Kanadasë dhe ishte fshehur në një hapësirë të posaçme, të modifikuar në një automjet të porositur për blerje në Kanada.
Përveç drogës, gjatë operacionit u sekuestruan edhe tre automjete, pesë telefona celularë dhe rreth 11 mijë euro cash.
Në pranga përfunduan Taulant Duraku, 32 vjeç, Luan Gashi, 26 vjeç dhe Besfort Jaka, 40 vjeç, të tre shtetas kosovarë. Ata dyshohen për veprën penale “Trafikimi i narkotikëve”, të parashikuar nga neni 283/a i Kodit Penal.
Ndërkohë, në kërkim janë shpallur H. C., lindur dhe banues në Kukës, dhe G. O., lindur në Kosovë dhe banues në Ontario të Kanadasë, të dyshuar për të njëjtën vepër penale.
Nga hetimet dyshohet se secili prej personave të përfshirë kishte role të përcaktuara në sigurimin, fshehjen, transportimin dhe shpërndarjen e lëndës narkotike.
Operacioni u zhvillua nga Sektori për Hetimin e Narkotikëve në DVP Durrës, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, në bashkëpunim me strukturat e Kufirit dhe Migracionit, Forcën e Posaçme Operacionale dhe autoritetet doganore.
Hetimet vijojnë për identifikimin dhe kapjen e personave të tjerë që dyshohet se mund të jenë të përfshirë në këtë aktivitet kriminal, si dhe për dokumentimin e plotë të rolit të secilit prej tyre.
Materialet procedurale i janë referuar Prokurorisë për veprime të mëtejshme.
©ZëriOnline
