Një 29-vjeçar, i dënuar më parë me 6 vite e 8 muaj burg nga GJKKO, për trafikimin e mjeteve motorike në kuadër të një grupi të strukturuar kriminal, u arrestua në Kamëz nga Antitrafiqet e Tiranës, pasi dyshohet se transportonte me automjet një pistoletë me qëllim trafikimin e saj. Bëhet fjalë për Ervis Carën, i cili u kap në kuadër të operacionit të koduar “Last Drive II”.
Blutë morën informacion se brenda makinës mund të kishte armë zjarri, e ndaluan dhe gjatë kontrollit të automjetit, iu gjet një pistoletë, ndërsa në banesën e tij u zbulua edhe një armë gjahu pa leje dhe 50 fishekë. Në total, u sekuestruan dy armët, municioni, automjeti, një telefon celular dhe një bllok shënimesh, ku dyshohet se mbaheshin të dhëna për shuma të ndryshme parash. Materialet e sekuestruar pritet të ndihmojnë hetuesit për identifikimin e personave të tjerë.
Përveç hetimit penal, për shkak të bllokut të gjetur ndaj 29-vjeçarit ka nisur edhe hetimi pasuror, për të verifikuar burimin e të ardhurave dhe pasurisë së tij, teksa akuzohet për trafikim të armëve dhe municionit dhe fshehja e të ardhurave.
Emri i Ervis Carës është i njohur edhe për drejtësinë. Në qershor 2023, Gjykata e Posaçme e dënoi atë me 10 vite burg për trafikimin e mjeteve motorike dhe grupin e strukturuar kriminal. Pas aplikimit të gjykimit të shkurtuar, dënimi përfundimtar u caktua në 6 vite e 8 muaj burg, në kuadër të një dosjeje për trafikimin e automjeteve nga Kosova drejt Shqipërisë. Në atë çështje, SPAK identifikoi një rrjet personash të dyshuar për trafikimin e mjeteve, ndërsa drejtues i grupit ishte Selaudin Shahini. Hetimet zbuluan rolet e disa personave në sigurimin dhe shitjen e automjeteve të trafikuara.
