Një ngjarje e rëndë është regjistruar pasditen e sotme në lagunën e Patokut, në Kurbin, ku dy 16-vjeçarë kanë hyrë për t’u larë, por fatkeqësisht vetëm njëri prej tyre ka mundur të dalë i gjallë nga uji.
Sipas informacioneve paraprake, rreth orës 15:00, të miturit kanë kaluar përmes kanalit që lidh lagunën me detin, për të notuar në ujërat e zonës. Kanëbpasur vështirësi. Njëri prej tyre është nxjerrë nga uji dhe është transportuar menjëherë në spital, ku po merr ndihmën e nevojshme mjekësore. Ndërkohë, shoku i tij dyshohet se është mbytur dhe deri më tani, trupi i tij nuk është gjetur.
Në vendin e ngjarjes ndodhen forcat e Komisariatit të Policisë Kurbin dhe të Policisë Kufitare, ndërsa është kërkuar edhe ndërhyrja e njësisë së polumbarëve të RENEA-s për vijimin e kërkimeve në ujë.
Grupi hetimor po punon për sqarimin e plotë të rrethanave të ngjarjes tragjike, ndërsa familjarët e të miturve ndodhen në gjendje të rënduar emocionale.
©️zërionline
