Një ngjarje e rëndë familjare është zbardhur nga policia e Fierit, pas hetimeve të shpejta dhe të thelluara që nxorën në dritë një vrasje të maskuar si aksident. Një 26-vjeçare, E. R., është arrestuar pasi akuzohet se ka mbytur të atin, 56-vjeçarin A. R., me tel, në banesën e tyre në fshatin Frashër, mbrëmjen e 23 korrikut. Fillimisht, ajo kishte paraqitur ngjarjen si një vdekje aksidentale, por provat hetimore rrëzuan versionin e saj.
Operacioni i koduar “Inskenimi”, i zhvilluar nga specialistët për Hetimin e Krimeve të Rënda në Drejtorinë Vendore të Policisë Fier, në bashkëpunim me Prokurorinë e Fierit, çoi në arrestimin e të resë dhe shoqërimin e nënës së saj, 53-vjeçares V. R., e cila dyshohet se ka bashkëpunuar në pastrimin e trupit të viktimës, me qëllim fshehjen e krimit dhe inskenimin e një aksidenti.
Sipas hetimeve, E. R. ka kryer vrasjen për motive të dobëta dhe pas veprimit të rëndë, në bashkëpunim me nënën e saj, ka tentuar të zhdukë gjurmët duke pastruar trupin e të ndjerit. Më pas, ajo telefonoi policinë dhe raportoi vdekjen e të atit si një rast aksidental.
Burime pranë grupit hetimor bëjnë me dije se gjatë marrjes në pyetje, 26-vjeçarja ka pranuar krimin, duke deklaruar se kishte përjetuar presion të vazhdueshëm psikologjik nga babai i saj, i cili e kontrollonte pasi ishte fanatik dhe nuk e lejonte të vishej sipas dëshirës. Sipas saj, ai i ndalonte çdo formë të argëtimit, sjellje që, sipas saj, e kishin çuar drejt një shpërthimi emocional fatal.
Nëna e saj, V. R., ndodhet aktualisht në ambientet e policisë, ku po merret në pyetje për të përcaktuar saktësisht rolin dhe përfshirjen e saj në këtë ngjarje.
Ndërkohë, hetimet po vijojnë nën drejtimin e Prokurorisë së Fierit, me qëllim dokumentimin e plotë të rrethanave të kësaj ngjarjeje tronditëse, që ka tronditur opinionin publik në Fier dhe më gjerë.
Materialet procedurale i janë referuar organit të akuzës për veprime të mëtejshme ligjore.
©️zërionline
