Policia e Durrësit ka zbardhur konfliktin e ndodhur më 20 gusht, në Hamallaj, ku një 28-vjeçar mbeti i plagosur me armë zjarri, pas një sherri për parkimin e një automjeti.
Në pranga u vunë Alfons Lekgegaj, 37 vjeç, banues në Hamallaj, i akuzuar për “vrasje me dashje, mbetur në tentativë, kryer në bashkëpunim” dhe “mbajtje pa leje të armëve”, si dhe Armen Sabliqi, 18 vjeç, nga Boraka e Shijakut, për “mbajtje pa leje të armëve të ftohta”.
Ndërkohë, policia ka shpallur në kërkim babë e bir, Altin Lekgegaj, 44 vjeç, dhe Serxho Lekgegaj, 21 vjeç, të dy nga Hamallaj, të dyshuar si bashkëpunëtorë në ngjarje.
Hetimet treguan se konflikti nisi me goditje me sende të forta dhe më pas degjeneroi në përdorim arme zjarri nga Alfons Lekgegaj, i cili qëlloi në drejtim të Liridon Rata, 28 vjeç, nga Kukësi. Ky i fundit mbeti i plagosur dhe ndodhet në Spitalin e Traumës në Tiranë, jashtë rrezikut për jetën.
Në vendngjarje policia gjeti dhe sekuestroi sende të forta, ndërsa gjatë kontrollit në lokalin e Armen Sabliqit u sekuestruan dy thika që ai i mbante pa leje.
Hetimet vijojnë për kapjen e të shpallurve në kërkim dhe dokumentimin e plotë të kësaj ngjarjeje.
©️zërionline
