Në sezonin e dytë të “Love Is Blind: UK”, një nga historitë më të përfolura ishte ajo e Bardhës, shqiptare e rritur në Britani, dhe Jed, një djalë 31 vjeç nga Essex me origjinë libaneze.
Bardha, 32 vjeçe, e cila në moshën pesëvjeçare u largua nga Kosova bashkë me familjen për shkak të luftës, u paraqit në emision si një grua ambicioze dhe e pavarur, me një fejesë të dështuar hedhur pas krahëve, në kërkim të dashurisë dhe vlerave për të pasur në krah një burrë të vërtetë.
Në “pods”, aty ku kandidatët njihen pa parë fytyrat e njëri-tjetrit, ajo dhe Jed u afruan, tërhoqën menjëherë nga njëri-tjetri, duke ndarë vlera të përbashkëta mbi familjen, kulturën dhe jetën.
Bisedat e tyre shkuan deri tek planet për të pasur dy fëmijë, madje edhe tek emrat që do t’u vendosnin. Në takimin e parë ballë për ballë, ata nuk ngurruan të thoshin “Të dua”, ndërsa propozimi i Jed-it ndaj Bardhës u cilësua si një nga momentet më emocionuese të sezonit.
Në udhëtimin romantik në Qipro, lidhja e tyre u forcua edhe më shumë, duke i bërë ata të spikasin si një nga çiftet më të dashura dhe më të qëndrueshme të këtij edicioni. Publiku i përjetoi si shembullin e një dashurie që kalon çdo kufi kulturor, gjuhësor apo personal.
©️zërionline
