Prokuroria e Durrësit ka kërkuar dënimin me burgim të përjetshëm për shtetasin Hysen Meta, i akuzuar për vrasjen e babait të tij, Pëllumb Meta, ngjarje e ndodhur më 10 shkurt 2024 në Shënavlash të Durrësit. Përveç tij, akuza ka kërkuar edhe dënime nga 3 deri në 30 vite burg për pjesëtarët e tjerë të familjes, të cilët dyshohet se kanë bashkëpunuar në krim.
Sipas dosjes hetimore të procedimit penal nr. 386/2024, ka rezultuar se Hysen Meta, në bashkëpunim me motrën e tij Hygerta Meta, kishin planifikuar me qetësi eliminimin e të atit. Të pandehurit, sipas Prokurorisë, siguruan armën e krimit dhe vendin ku do ta kryenin vrasjen. Në ditën e ngjarjes, teksa viktima ndodhej në kuzhinë, Hyseni e qëlloi katër herë me pistoletë, duke e lënë të vdekur në vend.
Hetimet zbuluan se pas krimit, Hyseni dhe Hygerta ndërmorën një sërë veprimesh për të zhdukur gjurmët, mbyllën vrimën e plumbit në mur, spostuan divanin ku kishte ndërruar jetë viktima, mbështollën trupin dhe e groposën në një kasolle bagëtish, vetëm pak metra larg banesës. Ata gjithashtu larguan automjetin nga shtëpia, zhdukën sendet personale të viktimës dhe armën e krimit. Për ta bërë edhe më të besueshme zhdukjen, Hyseni bëri kallëzim në polici, duke pretenduar se babai ishte larguar me dëshirë nga banesa.
Në seancën gjyqësore të datës 16 shtator, Prokuroria paraqiti kërkesat përfundimtare.
Për Hysen Metën, akuza ka kërkuar shpalljen fajtor për veprën penale “Vrasje për shkak të marrëdhënieve familjare” në bashkëpunim dhe dënim me burgim të përjetshëm, për “Mbajtja pa leje e armëve dhe municionit” dhe dënim me 3 vite burg, si dhe fajtor për “Fshehja dhe asgjësimi i kufomës” dhe dënim me 5 vite burg. Në zbatim të nenit 55 të Kodit Penal, bashkimi i dënimeve në një të vetëm u kërkua burgim i përjetshëm.
Për Hygerta Metën kërkoi shpalljen fajtore për “Vrasje për shkak të marrëdhënieve familjare” në bashkëpunim dhe dënim me 25 vite burg, si dhe për “Fshehja dhe asgjësimi i kufomës” dhe dënim me 5 vite burg, total u kërkuan 30 vite burg.
Për Amarildo Metën shpalljen fajtor për “Fshehja dhe asgjësimi i kufomës” dhe dënim me 5 vite burg.
Për Blerina Metën, nënën e tyre, prokuroria ka kërkuar shpalljen fajtore për “Veprime që pengojnë zbulimin e të vërtetës” dhe dënim me 3 vite burg.
Në sallën e gjyqit, Hygerta Meta ka pranuar se krimin e ka kryer vëllai i saj Hyseni, në praninë e saj. Të tjerët kanë mohuar pjesëmarrjen, por sipas Prokurorisë, provat janë të mjaftueshme për t’i shpallur fajtorë.
Ngjarja e Shënavlashit pati tronditur opinionin publik për shkak të përmasave të krimit brenda familjes, ndërsa gjykimi pritet të mbyllet së shpejti me vendimin e Gjykatës.
©️zërionline
